ਤਾਜਾ ਖਬਰਾਂ
ਉਦਯੋਗਿਕ ਨਗਰੀ ਲੁਧਿਆਣਾ ਵਿੱਚ ਅਪਰਾਧੀਆਂ ਨੇ ਪੁਲਿਸ ਦੇ ਨੱਕ ਵਿੱਚ ਦਮ ਕਰ ਦਿੱਤਾ ਹੈ। ਤਾਜ਼ਾ ਮਾਮਲੇ ਨੇ ਸ਼ਹਿਰ ਦੀ ਸੁਰੱਖਿਆ ਵਿਵਸਥਾ 'ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ, ਜਿੱਥੇ ਇੱਕ ਚੋਰ ਨੇ ਮਹਿਜ਼ 120 ਮਿੰਟਾਂ ਦੇ ਅੰਦਰ ਦੋ ਵੱਖ-ਵੱਖ ਇਲਾਕਿਆਂ ਵਿੱਚ ਚੋਰੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਕੇ ਸਨਸਨੀ ਫੈਲਾ ਦਿੱਤੀ।
ਵਾਰਦਾਤ ਦੀ ਸ਼ੁਰੂਆਤ ਗਿੱਲ ਰੋਡ ਤੋਂ ਹੋਈ, ਜਿੱਥੇ ਸ਼ਾਮ 4 ਵਜੇ ਇੱਕ ਫੈਕਟਰੀ ਦੇ ਬਾਹਰੋਂ ਮੁਲਜ਼ਮ ਨੇ ਇੱਕ ਐਕਟਿਵਾ ਉਡਾਈ। ਅਜੇ ਪੁਲਿਸ ਨੂੰ ਇਸ ਦੀ ਭਿਣਕ ਵੀ ਨਹੀਂ ਲੱਗੀ ਸੀ ਕਿ ਠੀਕ ਦੋ ਘੰਟਿਆਂ ਬਾਅਦ ਸਵਾ ਛੇ ਵਜੇ ਉਹੀ ਚੋਰ ਆਜ਼ਾਦ ਨਗਰ ਸਥਿਤ 'ਕੌਰ ਫੂਡਜ਼' ਦੇ ਦਫ਼ਤਰ ਵਿੱਚ ਦਾਖ਼ਲ ਹੋ ਗਿਆ। ਉੱਥੇ ਕੰਮ ਕਰ ਰਹੇ ਕਰਮਚਾਰੀ ਹਰਪ੍ਰੀਤ ਸਿੰਘ ਦੀਆਂ ਅੱਖਾਂ ਦੇ ਸਾਹਮਣੇ ਹੀ ਉਸ ਨੇ ਦਰਾਜ਼ ਵਿੱਚੋਂ ਕੀਮਤੀ ਲੈਪਟਾਪ, ਟੈਬਲੇਟ ਅਤੇ ਨਕਦੀ ਕੱਢੀ ਤੇ ਬੜੀ ਸਫ਼ਾਈ ਨਾਲ ਰਫ਼ੂ-ਚੱਕਰ ਹੋ ਗਿਆ।
ਦਫ਼ਤਰ ਦੀ ਮਾਲਕਣ ਅਮਰਜੀਤ ਕੌਰ ਨੇ ਦੱਸਿਆ ਕਿ ਜਿਸ ਤਰੀਕੇ ਨਾਲ ਚੋਰ ਨੇ ਸਿੱਧਾ ਦਰਾਜ਼ ਨੂੰ ਹੱਥ ਪਾਇਆ, ਉਸ ਤੋਂ ਲੱਗਦਾ ਹੈ ਕਿ ਉਸ ਨੂੰ ਸਾਰੇ ਭੇਤ ਪਤਾ ਸਨ। ਚੋਰੀ ਹੋਏ ਲੈਪਟਾਪ ਅਤੇ ਟੈਬ ਵਿੱਚ ਕਾਰੋਬਾਰ ਦਾ ਅਹਿਮ ਡਾਟਾ ਅਤੇ ਬਿਲਿੰਗ ਸੌਫ਼ਟਵੇਅਰ ਮੌਜੂਦ ਸੀ, ਜਿਸ ਕਾਰਨ ਕਾਰੋਬਾਰ ਨੂੰ ਭਾਰੀ ਸੱਟ ਵੱਜੀ ਹੈ। ਕਰਮਚਾਰੀ ਨੇ ਚੋਰ ਦਾ ਪਿੱਛਾ ਵੀ ਕੀਤਾ, ਪਰ ਸ਼ਾਤਰ ਮੁਲਜ਼ਮ ਤੰਗ ਗਲੀਆਂ ਦਾ ਫ਼ਾਇਦਾ ਉਠਾ ਕੇ ਭੱਜਣ ਵਿੱਚ ਕਾਮਯਾਬ ਰਿਹਾ।
ਥਾਣਾ ਸ਼ਿਮਲਾਪੁਰੀ ਦੀ ਪੁਲਿਸ ਨੇ ਇਲਾਕੇ ਦੀ ਸੀਸੀਟੀਵੀ ਫੁਟੇਜ ਖੰਗਾਲੀ ਹੈ, ਜਿਸ ਵਿੱਚ ਚੋਰ ਐਕਟਿਵਾ 'ਤੇ ਸਵਾਰ ਹੋ ਕੇ ਵਾਰਦਾਤ ਕਰਨ ਪਹੁੰਚਿਆ ਦਿਖਾਈ ਦੇ ਰਿਹਾ ਹੈ। ਪੁਲਿਸ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਐਕਟਿਵਾ ਵੀ ਉਸੇ ਸ਼ਾਮ ਚੋਰੀ ਕੀਤੀ ਗਈ ਸੀ। ਪੁਲਿਸ ਨੇ ਅਮਰਜੀਤ ਕੌਰ ਦੀ ਸ਼ਿਕਾਇਤ 'ਤੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਮੁਲਜ਼ਮ ਦੀ ਭਾਲ ਜਾਰੀ ਹੈ। ਹੁਣ ਸਵਾਲ ਇਹ ਉੱਠ ਰਿਹਾ ਹੈ ਕਿ ਜੇਕਰ ਚੋਰ ਇੰਨੀ ਨਿਡਰਤਾ ਨਾਲ ਸ਼ਹਿਰ ਵਿੱਚ ਘੁੰਮ ਕੇ ਵਾਰਦਾਤਾਂ ਕਰ ਰਹੇ ਹਨ, ਤਾਂ ਪੁਲਿਸ ਦੀ ਗਸ਼ਤ ਕਿੱਥੇ ਹੈ?
Get all latest content delivered to your email a few times a month.
